ජනප‍්‍රිය යන්නෙහි අර්ථය ජනයා අතර ප‍්‍රිය වූ හා ජනයා සමඟ වැඩෙන වශයෙන් සරලව අර්ථ දැක්විය හැකිය. 14 හා 16 වන සියවස් අතර කාලයේ පුරාණ ගී‍්‍රසියේ පුනුරුද යුගයේ සිට ජනප‍්‍රිය සංස්කෘතිය යන්න හඳුනාගෙන තිබේ. 19 වන සියවසේදී ව්‍යවහාරයට එක් වූ ජනප‍්‍රිය සංස්කෘතිය කාර්මීකරණය, නාගරීකරණය හා ගෝලීයකරණය සමඟ ප‍්‍රචලිත විය. 20 වන සියවස වන විට එය වඩාත් ප‍්‍රචලිත විය.
මහාචාර්ය සුනන්ද මහේන්ද්‍රයන් ”ජනප‍්‍රිය සංස්කෘතිය යනු ජනමෝහනීය සංස්කෘතියයි” යනුවෙන් දක්වා ඇත. නූතන කලා විචාරකයන්ට අනුව ”ජනප‍්‍රිය සංස්කෘතිය යනු බහුතර ජනතාවගේ සංස්කෘතිය වේ
.” බටහිර කලා විචාරකයන්ට අනුව ”ජනප‍්‍රිය සංස්කෘතිය සමාජයේ ජීවත්වන සියලූ දෙනාගේ සංස්කෘතිය වේ.” අතීතයේදී ජනප‍්‍රිය සංස්කෘතිය යන්න අර්ථකථනය කළේ එය සමාජයෙන් වෙන් වූ සීමිත වූත් ජන කොටසක් අතර පැතිර ගිය සංස්කෘතියක් ලෙසය. එහෙත් වර්තමාන අවධිය වනවිට එහි අර්ථය පුළුල් වී තිබේ. සංස්කෘතිය තුළ බිහිවුණු නව ප‍්‍රපංචයක් ලෙස ජනප‍්‍රිය සංස්කෘතිය හඳුනාගත හැකිය.
වත්මන් ලෝකයේ ජනප‍්‍රිය වූ සංස්කෘතික චර්යාවන් ව්‍යාප්ත වී තිබේ. ඒ වටා බිහිවන ජනප‍්‍රිය අංගයන් මිනිසා මිලදී ගන්නා දේ, ඇදහිලි විශ්වාස, හිතන දේ ඔස්සේද ව්‍යාප්ත වී ඇති සේයාවක් දිටිය හැකිය. බටහිර ලෝකයේ ජනප‍්‍රිය සංස්කෘතිය ඔස්සේ නව සංස්කෘතික රටාවන් බිහි වී තිබේ. ඇමරිකාව, ලතින් ඇමරිකාව, ප‍්‍රංශය, සෝවියට් දේශය වැනි රටවල බිහිවුණු තරුණ නැගිටීම් නිසා තරුණයින්ගේම චාරිත‍්‍ර සම්ප‍්‍රදායන් බිහිවීම තුළින් ජනප‍්‍රිය සංස්කෘතිය බිහි වී තිබේ.
ඉතිහාසය විමසන විට හැම සමාජයකටම ආවේණික ජනප‍්‍රිය සංස්කෘතියක් තිබී ඇත. අද දවසේ ජනප‍්‍රිය සංස්කෘතිය, ජනතාව විසින් නිෂ්පාදනය කළ දෙයක් වන අතර එය මහා පරිමාණයෙන් පැතිර යන්නේ ජන මාධ්‍ය කරණකොට ගෙනය. ජනප‍්‍රිය සංගීතය, බාල කඩදාසියේ මුද්‍රිත නවකතා, ටෙලි නාට්‍ය, වීඩියෝ සිනමා පට, නව පන්නයේ කලිසමක සිට ඉවතලන රේසරය දක්වා නිෂ්පාදිත දැන්වීම් සමුදාය ආදියෙන් අපගේ දිනපතා පරිසරය සැකසී තිබේ. මෙබඳු ක්ෂණිකව හඳුනාගත හැකි සංකේතවලින් නූතන ජනප‍්‍රිය සංස්කෘතිය සෑදී ඇත. ජනප‍්‍රිය සංස්කෘතිය ජනයා විසින් නිර්මාණය කරන ලද්දක්ද, ජනමාධ්‍යවල නිර්මිතයක්ද යන්න නිසැකව නිර්වචනය කළ නොහැක්කේ හැම විටම එය එකිනෙකට වෙනස්ව අන්තර් පෝෂණය වන බැවිනි. ජනප‍්‍රිය සංස්කාතිය මාධ්‍ය සංස්කෘතිය සමඟ අත්‍යන්තයෙන්ම බැඳී පවතී. මෙහි ප‍්‍රධාන ලක්ෂණය වනුයේ ග‍්‍රාහකයා ඉතා ඉක්මනින් ඇඳ බැඳ තබා ගැනීමයි. ජනප‍්‍රිය සංස්කෘතිය දිගු කාලීන මෙන්ම කෙටි කාලීනද වේ. ජනප‍්‍රිය සංස්කෘතිය වෙත ඉක්මනින්ම ආකර්ෂණය වනුයේ කාන්තාවන්, ළමුන් හා තාරුණ්‍ය වේ. සෑම විටම ජනප‍්‍රිය සංස්කෘතියට පදනම් වන්නේ සමාජ සංස්කෘතික මිථ්‍යාවන් හා ජනප‍්‍රවාදයන්ය.
ජනප‍්‍රිය සංස්කෘතිය යන්න පොදු ජන විඥානය මෙහෙයවන නව හෙජමනියක් ලෙස ජන මාධ්‍ය ක‍්‍රියාත්මක කරයි. එය විවිධ පුද්ගල හා ව්‍යාපාරික අපේක්ෂාවන් මත පදනම්ව බිහිව ඇති සංස්කෘතික කර්මාන්තයකි. ජන විඥානයට නව අංග හඳුන්වා දෙන නමුත් එම නව අංග පුද්ගල චර්යාවට නිශේධනාත්මකව බලපෑ හැකිය. භාණ්ඩ හා සේවා මූලික කරගත් වාණිජකරණය තුළ සංස්කෘතික නිෂ්පාදන සියල්ල බහුජන මාධ්‍ය විසින් ජනප‍්‍රිය සංස්කෘතික අංග බවට පත් කරයි.
No comments:
Post a Comment