හුස්ම

මිහිතලය මත ජීවත් වන මිනිසාගේ පමණක් නොව සියලූ සතාසීපාවාගේ හුස්ම පොදට ජීවය දෙන්නේ තුරු ලතාවන්ය. එපමණක් නොව අපගේ පණනල රැකදීමට ආහාර ජලය හා බෙහෙත් මෙන්ම මානවයාගේ ජීවිතයට අවශ්‍ය කරන බොහෝ දේවල් ඔවුන් නොපැකිලිව සපයනු ලබයි. හරිත පැහැය සැබවින්ම නෙතට ආශ්වාදයකි. ගත සිත ප‍්‍රබෝධමත් කරලීමේ විශ්මිත බලයක් ඔවුන් සතුය. නමුත් අද වන විට මේ හරිත ලෝකයේ පරම සතුරා බවට මිනිසා පත්ව ඇත. අපගේ ජීවය තුරුලූ කරගත් තුරු ලතාවන් දිනෙන් දින මින්සාගේ අසීමිත ආශාවන් පිනවනු වස් අහිංසක ගොදුරු බවට පත්ව ඇත. මෙම ආක‍්‍රමණශීලිත්වය හමුවේ ගස් වැල් හෙලන කදුලූ  ඔවුන්ගේ අදෝනාවන් කිසිවෙකුට නොඇසෙයි. ඇසුනද කිසිවෙකු සවන් නොදෙයි. ඔවුන්ගේ වටිනාකම් අවබෝධ කරගත් බොහෝ රටවල් කෘත‍්‍රිමව පවා ඔවුන්ව නිෂ්පාදනය කරලන්නට වෑයම් කරන මොහොතක අපගේ අරමුණ වී ඇත්තේ ඔවුන්ව බිල්ලට දී හෝ අපගේ වුවමනාවන් ඉටුකර ගැනීමටය. මිනිසාගේ නොනවතින ආශාවන් හමුවේ ඔවුන් මියැදෙමින් සිටියි. අපෙන් කිසිවක් බලාපොරොත්තු නොවීම අපව මියැදෙන්නට නොහැර ඔවුන්ගේ සාරය අපට ලබාදෙයි නම් අපද ඔවුන් ජීවත් කළ නොහැකිද   

මිහිකත අපගේ මව වේ. මිහිකතට සිදුවන කුමන හෝ අවාසනාවන්ත දෙයක් එහි දරුවන්ට සිදුවේ. මේ භූමිය මිනිසුන් විසින් කෙලෙසා දැමුවහොත් ඉන් සිදුවන්නේ තමන්ව කෙලෙසාගැනීමක් බව මතක තබා ගන්න. මේ ගස්වැල්වල ජීවය මිනිසාගේ ජීවයට සම යැයි සිතූ පරිසරයට බෙහෙවින් ආදරය කළ රතු ඉන්දියානු නායක සියැටල්ගේ හඩයි.

තුරු ලතාවන් මහපොළව මතට කපා හෙලීම සැබවින්ම සාපරාධයකි. අප විසින් සිදු කරනු ලබන මෙම අපරාධයට වන්දි ගෙවිය යුත්තේ අපගේ අනාගත උරුමක්කාරයින්ය. ඔවුන්ට තුරු ලතා නොමැති ලෝකයක අපිරිසිදු වාතයෙන් ආරක්ෂා වන්නට මුඛවාඩම් සහිතව ආශ්වාස  ප‍්‍රාශ්වාස කිරීමේ දිනය වැඩි ඈතක නොවන බව අප විසින් තරයේ මතක තබා ගත යුතුය.

මෙවන් ඛේදවාචකයන් රට තුළ සිදු වන විට තම තමන්ට හැකි අයුරින් පරිසරය වෙනුවෙන් නිහඩ සේවයක් සපයන මින්සුන් නැතුවාම නොවේ. ස්වභාදහමේ ආශිර්වාදය ඔවුන්ට නිරන්තරයෙන් හිමිවේ. ජීවත් වීමට මහත් අසීරු තත්ත්වයක් නිර්මාණය වෙමින් ලෝකයේ උෂ්ණත්වය වේගයෙන් ඉහළ යමින් පවතියි. මෙයට වගකිව යුත්තෝ කවුරුන්ද  පරිසරයේ අසීමිත ඉවසීම ආයුධයක් කර ගත් අපට නොබෝ දිනයකදීම පරිසරයෙන්ම එයට ප‍්‍රතිචාර හමුවනු නිසැකය.

ඔවුන්ට අවශ්‍ය අපගේ ආදරයයි. ඔවුන් වෙනුවෙන් අපගේ හඩ පමණක් නොව ක‍්‍රියාවෙන්ද ඔවුන්ට කළගුණ සැලකීම අප විසින් කළ යුතුම දෙයකි. තුරු ලතා විනාශ කරලීම නවතා දමමු. අපගේ හුස්ම පොද පමණක් නොව ඔවුන්ගේ හුස්ම පොදද අප විසින් රැක ගැනීම කළහොත් සැබවින්ම එය මිල කළ නොහැකි උතුම් ක‍්‍රියාවකි.